سندريلا الليبية في الشرقيه

طبعا كلنا نعرفو وسمعنا قصة سندريلا من صغرنا


و اكيدا اكيد انه

فلاور 90 ... بتونة العصر ... ميس فامبير ... فطومة ... الساحرة الهيفاء ... بيبي .. نيراج ... احاسيس... سمراء ... وملكة جمال ليبيا ... و كل بنات حواء يحلمو انهم

يرقصو مع الامير ...و تجي الساعة طناش و يهربو و يجري وراهم الامير .. و يزلقو في الدرجة و تطيح فردة شلاكتها ... و بعدين يجي الامير لزنقتهم و يطلعو بنات الزنقة كلهم و يقيسو الفردة و تطلع ليها (( في من ما تقيسش متحشمة من الشقاقة ))..


يالله نقولو كلاكيت و نبدو الحكاية

بدت الشمس تزرق في الشرقية ... و في حوش كبير (( 3 ادوار)) ... ومسيمنه قصر .. ((بالله هو في الشرقية و قصر !!!)).. و في القصر هذا تسكن فيه فاطمة العمشة و بناتها الزوز ... زينوبة ــــ و ـــ فتحية
ومعاهم اختهم من بوهم اللي هيا ربيبة فاطمة الحولة يا حنة و اسمها

سندريلا

المهم ... ناظت سندريلا لما زرقت فيها الشمس ... وخشت للكوجينة و بدت تعصد في العصيدة و توتيها لمرات بوها و خواتها... و بعد ما ضمت الكوجينة و كنست وسط الحوش و غسلت الحوايج ... ناضو خواتها و امهم لقو العصيدة

فاطمة الحولة : سندريلا .. انتي يا فرخة ... عصيدة باللعسل؟ وين الرب؟
سندريلا : دورت في الكوجينة مالقيتاش .. يمكن تم
فاطمة الحولة : شنو !! تم؟ يا فرحة امك بيك ...اكيد انت لاحساته يا مفجوعة
سندريلا : سكري فمك و مصمصيه بالزهر قبل ماتجيبي سيرة امي ..
فاطمة الحولة: تي والله كان انوضلك الا منريشلك شعرك اللي اللي زي الليفة ..
سندريلا : معلوم منو لشعرها زي الليفة .. شوفي بناتك المقملات و بعدين تكلمي عالشعر يا صلعة
زينوبة : نهار احرش ... تنوضي كسريلها وجهها يمة

و خشت بعضها دعكة بين فاطمة الحولة و سندريلا ... و ضربت سندريلا الحولة على تاكمها طيحتلها سنها و رفعوها للسبيتار ...

و هما مروحين من السبيتار
فاطمة الحولة : تي والله الا منوريها ..
فتحية : هيا نمشو نشكو فيها
زينوبة: ايه يمة نشكو فيها خلي يحبسوها
فاطمة الحولة : ..بعد ما يحبسوها منو بيضم الحوش و بيطيبلنا .. ماهو من فلاحتكم حتى لحسة مكرونة ما تعرفو تديروها
فتحية : لا هو انتي هو اللي كل يوم اتطهبجي
فاطمة الحولة : هيييييي ..كب ايامك غير راك تقوليها قدام حد براني

و اول ما خشو للشرقية سمعو واحد يعيط و يقول :

الحاظر يقول للغايب ... ولد العقيد خليفة مداير حفلة و جايب زمزمات و زكرة ... يبي يتزوج .. و كل بنات طرابلس معزمات و اللي بتعجبه بيتزوجها ...(( العقيد خليفة من اثرى اثرياء طرابلس ))
شافت زينوبة لامها و قالت : شنو بنمشو يمة و الا لا ؟

فاطمة الحولة : هييي .. و هذي في كلام .. اكيد بنمشو بلكي نفتك من وجه وحدة منكم .. و اهو نحصلو قصعة كسكسي بالمرة ..
فتحية : روروروروروروروروروروروروري .. بنتزوج بنتزوج
فاطمة الحولة : تي قعمزي و اهفتي يا بنت ... كان ما يصيرش خلي يدروني نساوين الشرقية نكتة ..




و روحو للحوش ...و قعدت سندريلا تكويلهم في حوايجهم و تلبس فيهم

سندريلا : شني يا عمتي فاطمة ... نمشي معاكم؟
فاطمة الحولة : عمية تعميك ... توا طلعتلك عمتك .. ااه؟ ... جاية تثغوطي توة ماهو صار فيها المشي .. ..(( و تمطقت تمطيقة باهية )) و بعدين ريتش هالمنظر اللي بتمشي .. امشي نقي شكارة الرز كلها ...و بعدين نقي الدشيشة ... تي والله نروح و نلقى فيهم حبة سودة نحارفك يومك ... تحسابي بنفوتهالك عملتك اااه؟ و الا تحسابيني بنسكتلك ... غير انروح بس

و طلعو و ركبو في افيكو الشرقية

فاطمة الحولة : وين .. المدينة ؟

السواق : لالا ..مكة ..كخخخخخخخخخخ .. ايه يا حاجة المدينة هيا راكبي

و ركبت هيا و بناويتها

واحد من الركاب شاف لزينوبة و عاكسها

زينوبة : يا سعدودي يا سعدودي ... معجب بيا

فاطمة الحولة : تي اسكتي انتي الثانية .. و بعدين شنو يا سعدودي هذي اه؟ ا تكلمي باهي يا بنت ..

زينوبة : هذا كلامي يمة ..

فاطمة الحولة : اسمعي .. ردي بالك تتكلمي و تشتخي قدام ولد العقيد .. اقعدي ساكتة .. و لما يقولك حاجة هزي راسك بس ..لين نجيكم انا و نسلك الامور باهي ؟

زينوبة : باهي كان قالي انا معجب بيك ... شنو بنهز راسي؟

فاطمة الحولة : تقعدي ساكتة بس ... شنو تبيه يسمع صوتك و يهرب ؟

فتحية : قبل ما نوصلو لحوش ولد العقيد بنسالك يمة

فاطمة الحولة : قولي يا همي ... اه غير كان تتسقدي انت بس ...

علاش قلتي لسندريلا تنقي الرز ؟ شنو عشانا رز بلاو؟

فاطمة الحولة : هذا فاش فالحة يا هبة يادبة ... فالحة غير في ديخك ...

...........زز

سندريلا و هيا تنقي في الرز ... قررت انها تمشي للحفلة .... طلعت للشارع و نادت على مصباح

سنريلا : مصباح ... بس ... اسمع

مصباح مش مصدرق روحه ... سندريلا تنادي فيه

مصباح : منو انا ؟

سندريلا : ايه انت .. امالة غولتك

مصباح : ايوة يا سندريلا ... تفضلي

سندريلا : نبي منك خدمة

مصباح : انت تؤمري يا سندريلا .. ادللي بس .. اطلبي عمري .. اطلبي روحي ...عيوني


سندريلا قالت في خاطرها يالله نغصب على روحي شوية و نتحمل بسالته و دمه لزي شكارة الشمنت ...و بعدين نوريه عمره و رحه كيف ... والله لو كان نعنس و انت اخر راجل ما ناخدك يا عايه ...

مصباح : خير القمر سرحانة ...

سندريلا : فيك يا بدر (( ياوجه الفقر )) ... نبي منك خديمة صغيرونة ..وكان انت تحبني حق تنفدهالي ...

مصباح : اؤمريني بس ...

سندريلا : يعني تنفد اللي نقولك عليه ؟

مصباح : تي غير قولي شنو تبي بس

سندريلا : نبيك تدبرلي في قفطان حليوة متع سهرة ... نبيه ضروري ضروري

مصباح : بس انت عارف خواتي كلهم سمونيات زي البقرات ..مافيش وحدة مقاسها زيك

سندريلا : معناها ماتحبنيش ..

مصباح : تي لا يا سندريلا .. انا نموت فيك ... اصبري ..تو نمشي لوليد صاحبي يخدم في لاوندرية .. اكيد نلقى عنده قفطان حلو يليق عليك يا تحفة انتي

سندريلا : باتهي برا بسرعة ..جري .. و انا نستناك هنا

و مشى مصباج و حصللها قفطان سهرة ابيض (( زي الفيللو )) .. و شكله هكي متع وحدة هابي

سندريلا : يا سلمك جياب و عليك حجاب ....اشيه يهبل ...

مصباح :باش تشوفي بس غلاوتك يا حبي ..

سندريلا : بلهي القفغطان مش يبي كنيدرة حلوة هكي تطلع عليه؟

مصباح :اتدللي

ومشى جابلها كندرة اخت صاحبه ...

سنريلا : يا سلمه يا سلمه ....

و هيا خاشة بتقيسهم ..نادها مصباح

مصباح : اسمعي ... الساعة طناش ضروري تجيبي القفطان

سندريلا : علاش؟

مصباح : ماهو صاحب اللاوندرية بيغسله و يسلمه لصاحبته غدوة

سندريلا : باهي باهي

مصباح : راهو كان ماجيتيش بيمشيلك في الحفلة و يحشمك قدام الناس



وخشت لبست القفطان و الكندرة ... و طلعت نادت مصباح تاني

مصباح : بي بي بي ..و لا جسم هيفاء وهبي ..ما شاء الله ما شاء الله

سندريلا : مصباح : نبي سيارة ضروري ضروري

مصباح : اتدللي

وقفلها اول بيضة وكحلة و خلص التاكسي و ركبت سندريلا

وصلت سندريلا للحفلة ...و الكل يتمقلو فيها و في قفطانها و خصوصا كنرتها ... وكانو يتمنو يعرفو من اي محل شاريتها ... المهم كان في شبيب واقف اسمه بوعجيلة.. شاف سندريلا انضرب فيها .. و قال هيا هاذي اللي ندور فيها ...

بوعجيلة : هاي

سندريلا : و عليكم السلام و رحمة الله ...

بوعجيلة : ممكن نتعرفو

سندريلا : شنو نتعرفو متعك هدي ... امشي العب بعيد ...

بوعجيلة : انا نبي نلعب معاك

سندريلا : شنو تبي مني .. مبدرك و مبرد دمك

بوعجيلة : انا نتعب مع البنات اللي زيك




واااااااااااااااااااااااك طارت النيه معش عندي نيه نكملها

كملو ها بروحكم
ههههههخخخخهههه