اعلان هام : الإدارة

السلام عليكم ورحمة الله وبركاته

اهلين كيف حالكم ؟؟
ان شاء الله اتكونوا كلمكم كويسين

نعتذر لكل الاعضاء لان 9 الشهور هادم ما قدرتش نفتح فيهم لان حاليا اني خارج البلاد والمنتدى ما ينفتحليش الا باستخدام بروكسي ومش ديما نلقى في واحد يفتحهولي

عارفة روحي مش حنقدر نعطي للمنتدى حقه بس حطيت كفترة مؤقتة عضوين اتق بيهم وعارفتهم انهم باذن الله حيكونوا قد المسؤولية


فلو احتجتوا اي حاجة اطلبوها منهم
وهم ان شاء الله حيحاولوا ايديروا احسن حاجة يقدروا ايديروها لانها اول مرة ليهم

انحب نشكر كل من جوهرة القصر ورنيم علي اهتمامهم وموافقتهم

ونشكر اعضاء المنتدى كلهم لصبرهم ومداومتهم علي الدخول ونشاطهم في المنتدى


شكرا لتفهمكم

السلام عليكم

بارك الله فيك لانك تفكرى فينا

لكن عندى ملاحظه هامه هلبه

الاعضوتين اللى عينتيهم من الادااره منشبحوش فيهم بكل قليل النادر يعنى يامديره لازم

انتى دققى فى قراراتك ادا كانوا هما ميخشوش بكل كيف حنى ادا نبوا حاجه حنلقوهم؟؟؟؟؟

نتمنى ان ماحد يزعل منى ومتفهمونيش غلط رنيم وجوهره عضوات جدا مميزات لكن المده الاخيره معاش عندهم تفاعل بكل

فيا مديره لازم اختيارك للاعضاء يكون شامل لكل شى ......براى لازم تختارى اعضاء عندهم تواجد دائم فى المنتدى

المهم ترجعى بالسلامه ان شاء الله

مشكوووووووووورة
بس أول وأهم حـــــــــــــاجة عندي الــــــــــــدردشـــــــــــــة
علاش نحيتو التشــــــات
وتشااوات

الذرذشه قاعذه ممكن المشكله في النت متاعك او المتصفح شوف الانترنت سيتنق وعذل فيها

السلام عليكم..
شكرا لأهتمامك بس عندي شوية نقاط نبي انوضحهم
فكرت كويس قبل ما نختار العضوتين , اخترتهم لعدة اسباب اولها اني عندي ثقة كاملة فيهم ونقدر نوصل فيهم في اي وقت نبيه ., وثاني سبب لأني واثقة كل الثقة انهم الوقت اللي ماخشوش فيه كان عندهم ظروف كانوا ايحاولوا ايخشوا بس الله غالب هم داروا اقصى حاجة يقدروا عليها ,واخترتهم لانهم من اقدم الاعضاء يعرفوا تقريبا كل شي علي المنتدى , وماكانش عندي اي خيار تاني لان اغلب الاعضاء اللي هم اهل لهذه المهمة يرفضوا حتى الاشراف العادي لانها مسؤولية واني انقدر قرارهم ونحترمه ,, والحق توقعت حتى جوهرة القصر ورنيم انهم ما ايوافقوش لانها مسؤولية كبيرة هلبا وعارفتهم لما وافقوا ما اعطونيش كلمة هكي وخلاص متاكدة اني حنشوف منهم اللي اني ما قدرتش انديره انتم جربوهم وكان ضايقوكم او حسيتوهم امقصرين بعدها احكموا عليهم , نشكرك مرة تانية علي اهتمامك واتمنى انكم تعطوهم فرصة لان الوقت اللي كانوا ايخشوا فيه كانوا يثبتوا فيه وجودهم ...

مشكوره الاء
لكن المشكله كلها فى الكساد المنتدى معش فى اعضاء زى قبل يخشولها ولا يديرو فى مواضيع وحتى الدردشه معش فيها حد يخشلها ان المنتدى كساااااااااااد هلباااااااااا يريت اديرو حل المشكله هادى

الولوة شن الجو وين هالغيبة والله المنتدى بجديات مكسد على الاخر كل يوم انخش ومانلقاش فى اى حد فى المنتدى