انواع الاولاد ل نشوفو فيهم فالنت هههه

انواع الولاد اللي تقابلو فيهم على النت...
المرحلة الأولى : ( الي يا دوبك كيف متعلم ويخش النت )

طبعا العمر يتراوح من 22 الى ما فوق ... وتلاقيه اول ما يخش النت يفتح الياهوو وعنده ايميل بنت واخده او خانبه من صاحبه او من صالة نت ويقوللها
هاي ممكن نتعرف؟
انا فلان ومن المنطقة الفلانيه وتحسوا ان فيه شيشمة معلومات اتفتحت
واي حاجة تقوليهاله يقولك شنو قصدك مش فاهم وبعد كل كلمة يقولك اصل انا قاعد جديد في النت


والنوعية هادي تنقسم لقسمين :
1- يا اما متحمس وحاط في دماغه موضوع النت ويبي يتعلم
2- يا اما سمع من صحابه عن النت انه يتعرفو على البنات وجاي يجرب حظه


(المرحلة الثانية: الي بيقعد على النت بس مش كتير)

النوع هادا كل كلامه انا مشاغلي هلبة ومانحبش نخش للنت والكلام هاده وبعد ما
يتكلم شوية (طبعا مع بنت) يقولك ممكن نكمل كلامي في التليفون انا اصلي ما نخشش النت
هلبة ومالياش خلوق للكتابة والحاجات هادي ومرات ان انخش وانتي ما تخشيش ومش راح نتقابل تاني فاعطيني رقمك باش حتى على الاقل لما نخش نكلمك مش حنتصل بيك هلبة
فوق اكبر تلاقيه شاري كرتين او عشرة كروت رصيد وبيفرغه عليها او ما تعطيه الرقم وطبعا يقول لصحابه ما عنديش رصيد(خزي على الولاد اللي هكي)

والنوعيه هادي تنقسم الى قسمين:
1- يا اما يبقى لحوح ونقناق ويقعد يطلب نفس الطلب لحد ما يفدد البنية في عيشتها او هي تعطيه الرقم لو اقنعها كلامه (نادرا ما تقتنع البنت لأنها معقدة حياتها ومعقدة الولد معاها)
2- يا اما يكون عنده عزة نفس وكرامة وميلحش وما ينقنقش بس حيتعصب وايدير روحه ايمن بن شداد (قصدي عنتر بن شداد) وويقول للبنية خلاص دريلي بلوك واحذفيني من ايميلك (اه انت يا عزة نفسي تي فوق اكبر تلاقيه جايب الصلاية والسبح ويصلي ويدعي ويقول يا رب ما تخليهاش تحذفني يا رب)


المرحلة التالته : ( الي قاعد على النت ليل نهار)


هذا ما نحكيلكش شرحه يطول وينقسم لعدة انواع

1- المتشنكح (يعني اللي خاش في بعضه وطالع)

هذا تلاقيه قاعد وحاطط ايده على الأزرار (بطم" باللغة الفصحى") الكي بورد اللي وعنده حساسية ضد البنات يعني اي واي حاجة تقوليها ليه يعني تقصديه فيها واهنتي كرامته وما احترمتيشي يقيس في غلاه من الأخير سواء للبنات اللي يعرفه او اللي ما يعرفهمش والجو هذا او بتقللي من شانه وبعد مدة من الكلام ممكن يقولك اعطيني رقم تليفونك ولما تعتذري وتتأسفيله وتقوليله ما نقدرش او مازال ماتعرفتش عليك يقولك انت قاعدة مش عاطية فيا الثقة ويقولك اوكي على راحتك
انا حنحترم رغبتك وحيركبلك بعدها الوجه الزينقو او وجه اللوح ويكلمك بغطرسة من وقت للتاني وحيديرلك البلوك ويحذفك من عنده (طبعا عاد هو 24 ساعة في النت ما يهمناش بنت مشت او بنت جت حيلاقي 10 غيرها)
فنصيحه من اولها ديريله انت بلوك وبومشي وشمنت وديليت

2-بو دم خفيف(على اساس شهلولي) وجوه مليح

هذا شلل عصبي متركز في في لسانه ودماغه ومتعرفيش من اللي خدعه وضاحك عليه وقاله ان دمه خفيف وكل كلامه حلو وسكر والحلويات كلها وقاله ان جوه مليح (اكيد اللي قاله الكلام هذا واحد من المصلحجية كان يبي من مصلحة فسمعه الكلام هذا )واغلبهم الولاد هذا الدراهات يكون اولاد الهابي وفوق الريح ومتاع مامي وبابي بس دمه رزين
والمفروض انك تكوني مجامله وتضحكي بس مننصحكش تجي على اعصابك وتحرقيها على خاطر واحد زي هذا .

3- المزاجي(يعني على حسب جوه)

وهذا تلاقوه شخصية بتتنوع كل يوم على حسب المزاج متاعه وحتتحسي انك بتكلمي واحد
عنده انفصام في الشخصية يعني اليوم رزين وعاقل وغدوة بارد وتافه وبعد يومين منحط وسافل
وبعدها كيوت وفريندلي (cute and friendly) طبعا الحكايه مش ناقصة هبال ياسر اللي سادك مكفيك

4- اللزقه( احرف من اللصقة السريعة) من الأخير العنكوشي واللي يعشش

والنوع هذا يبي منك حزم في التعامل معاه لأن كل كلامه انتي وين ؟ ويديرلك Buzz وبتعطلي في الرد ليش؟ انتي تتكلمي مع حد ؟؟ يا راجل وانت شنو دخلك تتكلم مع منو او منو اللي بحداها
......ولو قلتيله دقيقة حيقولك ليش ماشية وين ؟ ما تعطليش... بمجرد ما يكتب ما تعطليش تلاقيه باعتلك Buzz ويقولك شنو انت قاعدة ما رجعتيش؟ واااااااااااااااااك من النوعية هادي


5- الراس (على اساس فهومي ومثقف )

هذا لو تصبحتي ولقيتيه اونلاين حيكون صباح الصداع ونفخ الراس تلاقيه مع كل جمله حتقوليها هتاخدي نصيحة على اساس اخوية والجو الفايح وفيه عرض خاص قولي جملتين وخدي اربع نصايح العرض مستمر حتى نفاد الكمية
........ولو على منتدى زينا توا في منتدى الهندسة حتلاقيه بيقولك ليش حطيتي التوبيك هذا وركزو على التوبيك(يعني الموضوع) خلاص يعني مثقف ويقولك مستواك اعلى من انك تكتبي مواضيع زي هادي وليش نحيتي الموضوع هذاكا كان موضوع حلو ولما تجي اتدوري تلاقيه مطرود من المنتدى بس خاش بايميل او اسم تاني
انا ننصحك من توا تخليه يلحق خوته التانيين واديرليه بلوك
يعني بلوك وديليت من الأخير غيري ايميلك لأنه حيفددك في عيشتك

6- الحبيب( روميو )

ويقولك انت حلوة وانت قمر وانت شمس وقريب يسميلك المجموعة الشمسية كلها
ويقولك انا ما درتش علاقة مع بنت بكل فوق اكبر تلاقي بنتين بحداه في النت والتالتة تستنى فيه قدام المدرسة او الجامعة ويقولك انت بس اللي نبي نتعرف عليك ونبي نخطبك ونتجوزك وتلاقيه يخدم سيكليستي وقاعد واللي ياخد فيه يصرف فيه على البنات وطبعا لما تقتنعي بيه يجيبلك اكبر واحد من جماعة شارعهم يعني في جو الأربعين ويقوله تعالى انت وصاحبتك على اساس انك امي وبوي على اساس باش يقنعك انه بجد يبي يخطبك

7- المغرور (اللي نافش ريشه)
يقولك انا فيا جاذبية وكل البنات بتنعجب بيا ....... ايام ما كنت ف الكليه
كنت عامل دوشة والبنات بتتعارك عليا(هو ح يتعاركو عليه بس مش على خاطر جماله على خاطر يبو يحدفوه بالرشاد)...... المصيبة ان اي جمله
حتقوليهاله حيفهم ويتهيأله ان انتي معجبه بيه وتموتي باش تولي صاحبته بس مش بمزاجك لأنك راح تحبيه راح تحبيه لأنه هذا اللي يمشي معاكم باش تتنوسي انت واياه وتتشاركو في المراية وغرفة التجميل اللي في شنطتك طبعا تلاقيه يشوف في روحه في المراية اكتر منك

7- حريقة بنات

هذا ما نحكيليش لو في منتدى او ماسنجر او اي مكان فيه تجمع تلاقيه مركز على كل البنات ومايديرش شي غير انه يبعت لهاديكا ويكلم هاديكا بس احسن حاجة هو لما يكون خفيف يعني يشبح ايميل يساحبه بنت ويندمج يطلعله في الأخير ولد صاحبه مداير فيه مقلب

8- الكداب(اللي يحط فيهم حاويات حاويات)

من اول الأسم والعمر واي معلومة خدتيها كدب في كدب ومتعرفيش ليش وعلاش ؟ على اساس خايف على سمعته (هذا قوليله تي شنو حال ظهرك) انصحيه مني وخليه يغير اسمه على الماسنجر ويخليه (مسيلمة الكداب) ولما تجي اتدوري تلاقي مسيلمة الكذاب اصدق منه

9- العبيط

ايييييييييييييه ما تعديش هذا على طول تلاقيه حاطط صورة واحد من المغنين او فرق الراب او الروك
ولما تسأليه افتراضا انه يسمع للروك تقوليله ممكن تسمعني Heavey Metal على طول يبعتلك اغنية لأيمينم Eminem او لو كان مش عبيط هلبة يبعتلك اغنية ميتاليكا متاع - ناثينغ اند مادر Nothing and Mother او يقولك اسمها السو كلوس so close طبعا هي اسمها Nothing else matter وااااااااااااااااااااااك قداش ما يعقدو فيا الناس هادو على اساس خلاص خبرة وراس فوق روك وتلاقيه في الشارع يلبسلي في سروال عسكري ويقيملك شخشير للركبة ويقولك هادي موضة قراندي الزوزس هو يقصد قنز اند روزس Guns & Roses من الأخير اول ما تتقابلي في النت مع واحد زي هذا انتحري او معاش تخشي للنت لأنها لو خشيتي النت تاني وقابلتي شخص شكله تاني حتصيرلك نوبة عصبية وتعيشي متبهدلة في حياتك




10- المخروم بنات (يعني هوايته بنات)

هذا تلاقيه ممكن يكون على النت من سنة الف وتسعمية وزينقو ,,, وتلاقيه اتخرج واشتغل واتجوز وجاب صغار ومازال قاعد يتعرف على بنات وكل ما يكلم واحدة يقنعها انه مش متجوز وبيدور

على عروسة ونفسه يجيب اصغار وتلاقي ولاده قريب يوصلو لعمره وهو يخش على ايملاتهم ويلقط ايميلات زميلاتهم وصاحباتهم ويضيف لإيميله ولو جربتي تخشي بايميل تاني وتكلميه يعاودلك قصة حياته بس باسلوب مختلف يعني على حسب الطلب


وهادو هم انواع الشباب اللي حتقابلوهم على النت وان شاء الله عجبتكم التقسيمات


ههه مع تحيات ميسو

هههههههههههههههههههههههههه
مشكووور

منوره ههههههههههههه

وين باقي الاعضاء

hhhhhhhhhhhhhh
thaaaaaaaaaaaanx

منوووووووووووووور لكن متنساش انك حتي انت من النوع الي يجري وما يدري تي نوض يسرك من التزليز المنتدي
مدير عقد تزليز معك لكن مشكككور وريتنا نوعك من الولاد
اسمع نبصر عليك مشاركة حلوة

تانكس

هههههههههه اني من النوع النفاخ هههههههههه زيك بالزبط خوت هههههه


منورين كلكم لاكن بالرسمي الدوة ره ... في ولاد هكي نفاخين وطبعا اكيده منهم اني هههه ..


سلام ..