الى اخوتي الاعضاء

السلام عليكم ورحمة الله وبركاته
اهليييين كيف حااالكم ؟؟
ان شاء الله تمام
غبت عليكم فترة شوية طويلة"سااامحوني الظروف"
اني حاليا خارج البلاد والمنتدى الفترة اللي فاتت ماكانش يفتحلي
وتوا والحمد لله رجع يفتح من جديد
نشكر قبل كل شي كل من جوهرة القصر ورنيم
لأن وقت حاجتي ليهم القيتهم ووافقوا رغم انشغالهم وظروفهم انهم ايشدوا الادارة
ويهتموا بالمنتدى فترة غيابي
ونشكر كل الاعضاء اللي قعدوا في المنتدى واهتموا بيه
نشكر الاعضاء اللي اتواجدووا الفترة اللي فاتت كلها
رغم الظروف اللي مر بيها المنتدى وانه كان في فترة سبات
هادم هم الاعضاء الحقانيين اللي يهتموا بالمنتدى وايحبوه مش الفترة اللي ايكون فيها ناشط بس حتى امكسد ايخشوا وايحاولوا
وفي نفس الوقت في اعضاء قدموا الكثير للمنتدى واستفدنا واستمتعنا مع بعض بس للاسف هم قرروا ايسيبوا المنتدى هو كل شخص وليه ظروفه واسبابه الخاصة وما نجبروش حد انه يقعد معانا طبعا خبر خروجهم من المنتدى كان محزن لكن في الاخير حتقعد المواضيع اللي قدموها للمنتدى ديما موجودة وان شاء الله يستفيد منها كل شخص ايخش وتقعد ذكرى
في اللي عنده ظروف وفي بس لأن المنتدى كسد طلع
المهم نشكركم كلكم
وفي نفس الشي بعض المشاكل اللي صارت وقت غيابي اتمنى انها اتكون انحلت وما ايكونش في حد مضايق من اي عضو


طولت عليكم
باذن الله مع بعضنا نقدروا انرجعوا المنتدى زي ما كان واحلى
وفي الاخير
كل عام وانتم بخير بمناسبة المولد النبوي الشريف

ان شاء الله حنحاول نفتح كل ما انحصل فرصة

سامحوني طولت عليكم
السلام عليكم